
大寶伏藏TD122བླ་མ་ཡིད་བཞིན་ནོར་བུའི་གསོལ་འདེབས་དབང་བཞི་མྱུར་འབེབས་བཞུགས་སོ༔ གསོལ་འདེབས་ལེའུ་བཞི་པ་ཕྱི་ནང་གསང་གསུམ་ཟབ་བོ༔ ཕྱི་སྒྲུབ་གསོལ་འདེབས། སྟག་ཤམ།
5-34-1a
༄༅། །བླ་མ་ཡིད་བཞིན་ནོར་བུའི་གསོལ་འདེབས་དབང་བཞི་མྱུར་འབེབས་བཞུགས་སོ༔ གསོལ་འདེབས་ལེའུ་བཞི་པ་ཕྱི་ནང་གསང་གསུམ་ཟབ་བོ༔ ཕྱི་སྒྲུབ་གསོལ་འདེབས། སྟག་ཤམ།
༼ཧ྄༽བླ་མ་ཡིད་བཞིན་ནོར་བུའི་གསོལ་འདེབས་དབང་བཞི་མྱུར་འབེབས་བཞུགས་སོ༔ གསོལ་འདེབས་ལེའུ་བཞི་པ་ཕྱི་ནང་གསང་གསུམ་ཟབ་བོ༔ ཨྠྀི་༔ 
5-34-1b
བླ་མ་ཡིད་བཞིན་ནོར་བུ་ལ་ཕྱག་འཚལ་ལོ༔ བླ་མ་ཡིད་བཞིན་ནོར་བུ་ལས༔ དཀྱིལ་འཁོར་མུ་ཏིག་ཕྲེང་སྐོར་ལུགས་ཀྱི་གསོལ་འདེབས་དབང་བཞི་མྱུར་འབེབས་བྱ་བ་ནི༔ ཇོ་མོ་མཚོ་རྒྱལ་གུས་པས་ཉོན༔ དག་སྣང་ཚོམ་བུར་བྱུང་བཞིན་དུ༔ དམིགས་པས་གསོལ་བ་འདེབས་པར་གྱིས༔ བྱིན་རླབས་ཐོག་བབ་ཉིད་དུ་འབྱུང་༔ ཨེ་མ་ཧོ༔ གསང་སྔགས་བསྟན་པ་རྨད་བྱུང་ཤཱཀྱའི་ཞིང་༔ གསང་སྔགས་བདག་པོ་ཨོ་རྒྱན་ཆོས་ཀྱི་རྗེ༔ འཁོར་དུ་གྲུབ་ཐོབ་རིག་འཛིན་རྒྱ་མཚོས་བསྐོར༔ གསོལ་བ་འདེབས་སོ་ཨོ་རྒྱན་རིན་པོ་ཆེ༔ གུ་རུ་ཐུགས་རྗེ་ཅན་གྱིས་བྱིན་གྱིས་རློབས༔ གསོལ་འདེབས་བུ་ལ་དབང་བཞི་ཡོངས་རྫོགས་སྐུར༔ ཅེས་ཚིག་འོག་མ་གསུམ་པོ་འགྲེས་སུ་བྱ། འོག་མིན་ཆོས་དབྱིངས་དག་པའི་ཞིང་ཁམས་སུ༔ སྟོན་པ་པད་འབྱུང་རྡོ་རྗེ་འཆང་ཆེན་ལ༔ བདེ་གཤེགས་རིགས་ཀྱི་ཚོམ་བུ་འབུམ་ཕྲག་བསྐོར༔ 
5-34-2a
གསོལ་བ་འདེབས་སོ་ཨོ་རྒྱན་རིན་པོ་ཆེ༔ གུ་རུ་ཐུགས་རྗེ་ཅན་གྱིས་བྱིན་གྱིས་རློབས༔ གསོལ་འདེབས་བུ་ལ་དབང་བཞི་ཡོངས་རྫོགས་སྐུར༔ ལྷུན་གྲུབ་འོད་ལྔ་དག་པའི་ཞིང་མཆོག་ན༔ པདྨ་ལོངས་སྐུ་སངས་རྒྱས་རིགས་ལྔ་ལ༔ རིགས་ལྔ་ཞི་ཁྲོ་ཚོམ་བུ་འབུམ་ཕྲག་བསྐོར༔ གསོལ་བ་འདེབས་སོ༴ གུ་རུ་ཐུགས་རྗེ༴ གསོལ་འདེབས༴ འཇའ་འོད་མེ་དཔུང་འབར་བའི་ཞིང་ཁམས་སུ༔ པདྨ་ཆེ་མཆོག་དཔལ་ཆེན་ཧེ་རུ་ཀ༔ ཁྲོ་བོ་ཁྲག་འཐུང་ལྷ་ཚོགས་འབུམ་ཕྲག་བསྐོར༔ གསོལ་བ་འདེབས་སོ༴ གུ་རུ་ཐུགས༴ གསོལ་འདེབས་བུ་ལ༴ རབ་བརྟན་བདེ་བ་ཆེན་པོའི་ཞིང་ཁམས་སུ༔ སྟོན་པ་ཨོ་རྒྱན་མགོན་པོ་ཚེ་དཔག་མེད༔ འཆི་མེད་ཚེ་ཡི་རིག་འཛིན་འབུམ་ཕྲག་བསྐོར༔ གསོལ་བ་འདེབས༴ གུ་རུ་ཐུགས༴ གསོལ་འདེབས༴ ཕོ་བྲང་རི་བོ་ཏ་
5-34-2b
ལའི་ཞིང་མཆོག་ཏུ༔ པདྨ་ཐུགས་རྗེ་ཆེན་པོ་འགྲོ་འདུལ་ལ༔ ཐུགས་རྗེ་རིགས་འདུས་ཚོམ་བུ་འབུམ་གྱིས་བསྐོར༔ གསོལ་བ་འདེབས༴ གུ་རུ་ཐུགས་རྗེ༴ གསོལ་འདེབས་བུ༴ འཁོར་ལོ་རྩེ་ལྔ་འབར་བའི་ཞིང་ཁམས་སུ༔ པདྨ་འཇམ་དཔལ་གཞོན་ནུར་གྱུར་པ་ལ༔ སྐུ་ཡི་རིག་འཛིན་ཚོམ་བུ་འབུམ་གྱིས་བསྐོར༔ གསོལ་བ་འདེབས་སོ༴ གུ་རུ་ཐུགས༴ གསོལ་འདེབས༴ དབང་ཆེན་རྟ་མཆོག་རོལ་པའི་ཞིང་ཁམས་སུ༔ ཨོ་རྒྱན་པདྨ་དབང་ཆེན་རྟ་མཆོག་ལ༔ གསུང་གི་རིག་འཛིན་ཚོམ་བུ་འབུམ་གྱིས་བསྐོར༔ གསོལ་བ་འདེབས༴ གུ་རུ༴ གསོལ་འདེབས༴ གནས་མཆོག་ལྕང་ལོ་འབར་བའི་ཞིང་ཁམས་སུ༔ པདྨ་གསང་སྔགས་མཛོད་འཛིན་ཕྱག་རྡོར་ལ༔ ཐུགས་ཀྱི་རིག་འཛིན་ཚོམ་བུ་འབུམ་གྱིས་བསྐོར༔ གསོལ་བ་འདེབས༴ གུ་རུ༴ གསོལ་འདེབས༴ བཻ་ཌཱུརྱ་ཡི་ཞིང་ཁམས་དྲི་མེད་དུ༔ པདྨ་སངས་རྒྱས་སྨན་བླ་ཆེན་པོ་ལ༔ དྲང་སྲོང་སྨན་གྱི་ལྷ་ཚོགས་འབུམ་ཕྲག་བསྐོར༔ གསོལ་བ་འདེབས༴ གུ་རུ༴ གསོལ་འདེབས༴ བསྐལ་བཟང་སངས་རྒྱས་གངྒའི་ཞིང་ཁམས་སུ༔ པདྨ་སངས་རྒྱས་ཕྲིན་ལས་གཅིག་བསྡུས་ལ༔ བསྐལ་བཟང་སངས་རྒྱས་སྟོང་དང་རྩ་གཉིས་བསྐོར༔ གསོལ་བ༴ གུ་རུ༴ གསོལ་འདེབས༴ གནས་མཆོག་པདྨ་འོད་ཀྱི་ཞིང་ཁམས་སུ༔ པདྨ་ཆོས་རྒྱལ་དྲག་པོར་སྨྲ་བ་ལ༔ ཤ་ཟ་སྲིན་པོའི་རིག་འཛིན་འབུམ་གྱིས་བསྐོར༔ གསོལ་བ་འདེབས༴ གུ་རུ༴ གསོལ་འདེབས༴ ཨོ་རྒྱན་
5-34-3a
མཁའ་སྤྱོད་རིག་འཛིན་ཞིང་ཁམས་སུ༔ ཨོ་རྒྱན་པདྨ་གར་གྱི་དབང་ཕྱུག་ལ༔ དཔའ་བོ་མཁའ་འགྲོ་རིག་འཛིན་འབུམ་གྱིས་བསྐོར༔ གསོལ་བ་འདེབས༴ གུ་རུ༴ གསོལ་འདེབས༴ དབང་དྲག་རྟ་མཆོག་རོལ་པའི་ཞིང་ཁམས་སུ༔ ཨོ་རྒྱན་དྲེགས་འདུལ་པདྨ་དབང་དྲག་ལ༔ རྟ་མཆོག་རོལ་པ་གསང་སྔགས་ལྷ་ཡིས་བསྐོར༔ གསོལ་བ༴ གུ་རུ༴ གསོལ་འདེབས༴ འཐུག་པོ་བཀོད་པའི་ཞིང་མཆོག་དམ་པ་རུ༔ ཨོ་རྒྱན་ཆེན་པོ་བྷུདྡྷ་ཐོད་ཕྲེང་རྩལ༔ སངས་རྒྱས་རིགས་ཀྱི་མཁའ་འགྲོ་འབུམ་ཕྲག་བསྐོར༔ གསོལ་བ༴ གུ་རུ༴ གསོལ་འདེབས༴ མངོན་པར་དགའ་བའི་ཞིང་མཆོག་དམ་པ་རུ༔ ཨོ་རྒྱན་ཆེན་པོ་རྡོ་རྗེ་ཐོད་ཕྲེང་རྩལ༔ རྡོ་རྗེ་རིགས་ཀྱི་མཁའ་འགྲོ་འབུམ་ཕྲག་བསྐོར༔ གསོལ་བ༴ གུ་རུ༴ གསོལ་འདེབས༴ དཔལ་དང་ལྡན་པའི་ཞིང་མཆོག་དམ་པ་རུ༔ ཨོ་རྒྱན་ཆེན་པོ་རཏྣ་ཐོད་ཕྲེང་རྩལ༔ རིན་ཆེན་རིགས་ཀྱི་མཁའ་འགྲོ་འབུམ་གྱིས་བསྐོར༔ གསོལ་བ་འདེབས༴ གུ་རུ༴ གསོལ་འདེབས༴ བདེ་བ་ཅན་གྱི་ཞིང་མཆོག་དམ་པ་རུ༔ ཨོ་རྒྱན་ཆེན་པོ་པདྨ་ཐོད་ཕྲེང་རྩལ༔ པདྨ་རིགས་ཀྱི་མཁའ་འགྲོ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ༔ ལས་རབ་རྫོགས་པའི་ཞིང་མཆོག་དམ་པ་རུ༔ ཨོ་རྒྱན་ཆེན་པོ་ཀརྨ་ཐོད་ཕྲེང་རྩལ༔ ཀརྨ་རིགས་ཀྱི་མཁའ་འགྲོ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ཤར་ཕྱོགས་གཏུམ་དྲག་འབར་བའི་དུར་ཁྲོད་ནས༔ 
5-34-3b
ཨོ་རྒྱན་རིག་འཛིན་པདྨ་འབྱུང་གནས་ལ༔ མི་ཕྱེད་རྡོ་རྗེ་མཁའ་འགྲོ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ཤར་ལྷོ་བསིལ་བ་ཚལ་གྱི་དུར་ཁྲོད་དུ༔ གུ་རུ་ཨོ་རྒྱན་པདྨ་སཾ་བྷ་ལ༔ མི་འདའ་གཉན་གྱི་མཁའ་འགྲོ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ལྷོ་ཕྱོགས་སྐུ་ལ་རྫོགས་པའི་དུར་ཁྲོད་ནས༔ གུ་རུ་པདྨ་བློ་ལྡན་མཆོག་སྲེད་ལ༔ གཟི་བརྗིད་རིན་ཆེན་མཁའ་འགྲོ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ལྷོ་ནུབ་བདེ་ཆེན་བརྡལ་བའི་དུར་ཁྲོད་དུ༔ ཨོ་རྒྱན་ཆེན་པོ་པདྨ་རྒྱལ་པོ་ལ༔ སྣ་ཚོགས་དབང་གི་མཁའ་འགྲོ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ནུབ་ཕྱོགས་པདྨ་བརྩེགས་པའི་དུར་ཁྲོད་ནས༔ གུ་རུ་པདྨ་ཉི་མ་འོད་ཟེར་ལ༔ དྲི་མེད་པདྨ་མཁའ་འགྲོ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ནུབ་བྱང་ལྷུན་གྲུབ་བརྩེགས་པའི་དུར་ཁྲོད་ནས༔ གུ་རུ་པདྨ་ཤཱཀྱ་སེངྒེ་ལ༔ ཀུན་ཏུ་རྒྱུ་བའི་མཁའ་འགྲོ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ བྱང་ཕྱོགས་ཀཱི་ལ་སྒྲོག་པའི་དུར་ཁྲོད་དུ༔ གུ་རུ་པདྨ་སེངྒེ་སྒྲ་སྒྲོག་ལ༔ མི་ཐུབ་ཀརྨ་མཁའ་འགྲོ་འབུམ་གྱིས་བསྐོར༔ གསོལ་བ་འདེབས་སོ༴ གུ་རུ་ཐུགས་རྗེ༴ གསོལ་འདེབས་བུ་ལ༴ བྱང་ཤར་ལངྐ་བརྩེགས་པའི་དུར་ཁྲོད་ན༔ གུ་རུ་པདྨ་རྡོ་རྗེ་གྲོ་ལོད་ལ༔ རིག་འཛིན་འཇིག་རྟེན་མཁའ་འགྲོ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ དྲི་མ་མེད་པའི་ཞིང་མཆོག་དམ་པ་ན༔ གུ་རུ་པདྨ་སྐྱེད་བཟང་ཆེན་པོ་
5-34-4a
ལ༔ དྲི་མེད་རིགས་ཀྱི་རིག་འཛིན་འབུམ་གྱིས་བསྐོར༔ གསོལ་བ་འདེབས༴ གུ་རུ༴ གསོལ་འདེབས༴ ཡོན་ཏན་འབྱུང་གནས་ཞིང་མཆོག་དམ་པ་ན༔ གུ་རུ་པདྨ་འོད་བཀོད་ཆེན་པོ་ལ༔ ཡོན་ཏན་རིགས་ཀྱི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རྒྱན་རྣམས་བཀོད་པའི་ཞིང་མཆོག་དམ་པ་རུ༔ ཨོ་རྒྱན་གུ་རུ་པདྨ་གར་དབང་ལ༔ རིག་འཛིན་མཁའ་འགྲོ་འབུམ་ཕྲག་དུ་མས་བསྐོར༔ གསོལ་བ༴ གུ་རུ༴ གསོལ་འདེབས༴ བག་ཚ་མེད་པའི་ཞིང་མཆོག་དམ་པ་རུ༔ ཨོ་རྒྱན་པདྨ་དོན་ཡོད་རྡོ་རྗེ་ལ༔ དོན་གྲུབ་རིགས་ཀྱི་ལྷ་ཚོགས་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རྣམ་པར་མཛེས་ལྡན་དམ་པའི་ཞིང་ཁམས་སུ༔ ཨོ་རྒྱན་པདྨ་འཁྲུལ་ཞིག་སེངྒེ་ལ༔ རྟོག་བྲལ་རྣལ་འབྱོར་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རབ་ཏུ་སྣང་བར་བྱེད་པའི་ཞིང་མཆོག་ཏུ༔ ཨོ་རྒྱན་པདྨ་འཛུམ་བཞད་རྩལ་འཆང་ལ༔ ཕ་རྒྱུད་གསལ་སྣང་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རབ་ཏུ་སྣང་བྱེད་ཞིང་མཆོག་དམ་པ་རུ༔ ཨོ་རྒྱན་པདྨ་ཐུགས་རྗེ་འགྲོ་འདུལ་ལ༔ ཐུགས་རྗེ་རིགས་འདུས་ཚོམ་བུ་འབུམ་གྱིས་བསྐོར༔ གསོལ་བ་འདེབས༴ གུ་རུ༴ གསོལ་འདེབས༴ གདུང་བ་རབ་སེལ་ཞིང་མཆོག་དམ་པ་རུ༔ ཨོ་རྒྱན་པདྨ་འཇིག་རྟེན་དབང་ཕྱུག་ལ༔ གསུང་གི་དབང་ཕྱུག་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རྣམ་པར་
5-34-4b
ཡོངས་སུ་སྣང་བའི་ཞིང་མཆོག་ཏུ༔ ཨོ་རྒྱན་པདྨ་འཁོར་བ་དོང་སྤྲུགས་ལ༔ ཐུགས་རྗེ་ཅན་གྱི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རིན་ཆེན་བཀོད་པའི་ཞིང་མཆོག་དམ་པ་རུ༔ ཨོ་རྒྱན་པདྨ་རབ་བྱུང་ཐུབ་དབང་ལ༔ ཉན་ཐོས་ཆ་འཛིན་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རྣམ་པར་བཀྲམ་པའི་ཞིང་མཆོག་དམ་པ་རུ༔ ཨོ་རྒྱན་པདྨ་ཤུགས་ཅན་འཁོར་ལོ་ལ༔ འཇིགས་བརྒྱད་སྐྱོབ་པའི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རིན་ཆེན་གསེར་འོད་དམ་པའི་ཞིང་མཆོག་ཏུ༔ ཨོ་རྒྱན་པདྨ་དཔལ་འབར་ཞེས་བྱ་ལ༔ གསེར་གྱི་ཡན་ལག་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ བཻ་ཌཱུརྱ་ཡི་ཞིང་མཆོག་དམ་པ་རུ༔ ཨོ་རྒྱན་པདྨ་ཀུན་སྐྱོང་ཆེན་པོ་ལ༔ སྨན་བླ་རིགས་ཀྱི་ཚོམ་བུ་འབུམ་གྱིས་བསྐོར༔ གསོལ༴ གུ་རུ༴ གསོལ་འདེབས༴ སྤྲིན་ཆེན་བཀོད་པའི་ཞིང་མཆོག་དམ་པ་རུ༔ ཨོ་རྒྱན་པདྨ་རིགས་དབང་ཆེན་པོ་ལ༔ དབང་ཆེན་རིགས་ཀྱི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ཡིད་ལ་མངོན་དགའི་ཞིང་མཆོག་དམ་པ་རུ༔ ཨོ་རྒྱན་པདྨ་མེ་ལོང་རྒྱལ་པོ་ལ༔ སྟོང་ཉིད་ཡེ་ཤེས་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ དཀྱིལ་འཁོར་མེ་ལོང་བརྒྱན་པའི་
5-34-5a
ཞིང་ཁམས་སུ༔ ཨོ་རྒྱན་པདྨ་ཅོད་པན་ཐོད་ཕྲེང་རྩལ༔ མཉམ་ཉིད་གྲུབ་པའི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ཟླ་བ་རབ་བརྒྱན་ཞིང་མཆོག་དམ་པ་རུ༔ ཨོ་རྒྱན་པདྨ་ཡིད་སྣང་ཅོད་པན་ལ༔ སོ་སོར་རྟོག་པའི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ཉི་ཟླ་འོད་གསལ་བརྒྱན་པའི་ཞིང་ཁམས་སུ༔ ཨོ་རྒྱན་པདྨ་ཨིནྡྲ་ནཱི་ལ་ལ༔ བྱ་གྲུབ་ཡེ་ཤེས་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ སྤོས་ཀྱི་དྲི་ལྡན་ཞིང་ཁམས་དམ་པ་རུ༔ ཨོ་རྒྱན་པདྨ་རྣམ་དག་ཡེ་ཤེས་ལ༔ ཆོས་དབྱིངས་ཡེ་ཤེས་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རྣམ་པར་སྤྲོ་བྱེད་ཞིང་ཁམས་དམ་པ་རུ༔ ཨོ་རྒྱན་པདྨ་མེ་ལོང་རྒྱལ་པོ་ལ༔ མེ་ཏོག་རིགས་ཀྱི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རིན་ཆེན་འཕྲོ་བྱེད་ཞིང་མཆོག་དམ་པ་རུ༔ ཨོ་རྒྱན་པདྨ་རྒྱལ་པོ་ཀི་ལིང་ལ༔ ཐུགས་ཀྱི་རིགས་ཀྱི་ཚོམ་བུ་འབུམ་གྱིས་བསྐོར༔ གསོལ་བ་འདེབས༴ གུ་རུ༴ གསོལ་འདེབས༴ འོད་ཟེར་འབྱུང་གནས་ཞིང་མཆོག་དམ་པ་རུ༔ ཨོ་རྒྱན་པདྨ་འགྲོ་བ་ཀུན་སྐྱོང་ལ༔ གསུང་གི་རིགས་ཀྱི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ དགའ་བ་རྣམ་དག་ཞིང་མཆོག་དམ་པ་རུ༔ ཨོ་རྒྱན་པདྨ་གཡུལ་ངོ་རྣམ་རྒྱལ་
5-34-5b
ལ༔ སྐུ་ཡི་རིགས་ཀྱི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ གཙུག་ཏོར་རྣམ་བཀོད་ཞིང་མཆོག་དམ་པ་རུ༴ ཨོ་རྒྱན་པདྨ་སྲིད་གསུམ་མགོན་པོ་ལ༔ ཡོན་ཏན་རིགས་ཀྱི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ངེས་པ་ཅན་གྱི་ཞིང་མཆོག་དམ་པ་རུ༔ ཨོ་རྒྱན་པདྨ་ཀོ་ཤའི་རྒྱལ་པོ་ལ༔ ཕྲིན་ལས་རིགས་ཀྱི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ངེས་པར་འཕགས་པའི་ཞིང་མཆོག་དམ་པ་རུ༔ ཨོ་རྒྱན་པདྨ་བཤེས་གཉེན་ལམ་སྟོན་ལ༔ རྦོད་གཏོང་རིགས་ཀྱི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ བདེ་བར་སྤྱོད་པར་བྱེད་པའི་ཞིང་ཁམས་སུ༔ ཨོ་རྒྱན་པདྨ་གཅོད་འཇོམས་ཆེན་པོ་ལ༔ མཆོད་བསྟོད་རིགས་ཀྱི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ པདྨ་བཀྲམ་བྱེད་རྒྱས་པའི་ཞིང་ཁམས་སུ༔ ཨོ་རྒྱན་པདྨ་རང་བྱུང་འདོད་དགུ་ལ༔ དྲག་སྔགས་རིགས་ཀྱི་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ཡོངས་སུ་རབ་གྲགས་ཞིང་མཆོག་དམ་པ་རུ༔ ཨོ་རྒྱན་པདྨ་འདྲེན་མཆོག་དེད་དཔོན་ལ༔ སྐུ་གསུམ་རིགས་འདུས་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རྣམ་པར་འཕྲུལ་བྱེད་ཞིང་ཁམས་དམ་པ་རུ༔ ཨོ་རྒྱན་པདྨ་བཀའ་རྟགས་རྒྱལ་པོ་ལ༔ ཕ་རྒྱུད་ལྷ་ཚོགས་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རྣམ་པར་
5-34-6a
སྦྱངས་པའི་ཞིང་མཆོག་དམ་པ་རུ༔ ཨོ་རྒྱན་པདྨ་ཀློང་ཡངས་རྣམ་དག་ལ༔ མ་རྒྱུད་ལྷ་ཚོགས་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ པདྨ་སྨན་མཆོག་རྣམ་རྒྱལ་ཞིང་མཆོག་ཏུ༔ ཨོ་རྒྱན་པདྨ་རབ་དགའ་སྤྱོད་ཡུལ་ལ༔ སྨན་གྱི་ལྷ་ཚོགས་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ གསེར་གྱི་སྣང་འོད་ཞིང་མཆོག་དམ་པ་རུ༔ ཨོ་རྒྱན་པདྨ་རིན་ཆེན་སྣ་ཚོགས་ལ༔ འདོད་འབྱུང་ནོར་ལྷའི་ལྷ་ཚོགས་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ བཀོད་པ་འོད་ཟེར་ཞིང་མཆོག་དམ་པ་རུ༔ ཨོ་རྒྱན་པདྨ་དྲག་པོ་ཕུར་པ་ལ༔ སྒྲོལ་བྱེད་ལྷ་ཚོགས་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རིན་ཆེན་དམ་པ་གསེར་འབྱུང་ཞིང་ཁམས་སུ༔ ཨོ་རྒྱན་པདྨ་ལྷུན་གྲུབ་དབང་ཆེན་ལ༔ དབང་གི་ལྷ་ཚོགས་ཚོམ་བུ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ དཔལ་གྱི་འབྱུང་གནས་ཞིང་མཆོག་དམ་པ་རུ༔ ཨོ་རྒྱན་པདྨ་སྐྱེ་མེད་མཐའ་བྲལ་ལ༔ ཕྱག་རྒྱ་ཆེན་པོའི་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ སྣང་བྱེད་དམ་པའི་ཞིང་ཁམས་འོད་སྣང་དུ༔ ཨོ་རྒྱན་པདྨ་འཇིགས་མེད་བདེ་སྦྱིན་ལ༔ ཚེ་ལ་དབང་བའི་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ མྱ་ངན་མེད་པའི་ཞིང་མཆོག་དམ་པ་རུ༔ ཨོ་རྒྱན་པདྨ་མཐོང་གྲོལ་ལེགས་པ་ལ༔ ས་ལ་གནས་
5-34-6b
པའི་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ དགའ་བ་མདངས་ཅན་ཞིང་མཆོག་དམ་པ་རུ༔ ཨོ་རྒྱན་པདྨ་སྐྱེས་མཆོག་ནམ་མཁའ་ལ༔ རྣམ་པར་སྨིན་པའི་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ གཟི་བརྗིད་འབྱུང་བའི་ཞིང་མཆོག་དམ་པ་རུ༔ ཨོ་རྒྱན་པདྨ་པདྨ་སཾ་བྷ་ལ༔ ལྷུན་གྱིས་གྲུབ་པའི་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ འདུས་བྱས་སངས་རྒྱས་ཞིང་མཆོག་དམ་པ་རུ༔ ཨོ་རྒྱན་པདྨ་རིན་ཆེན་ཕྲེང་སྤྲས་ལ༔ བྱ་རྒྱུད་རིགས་ཀྱི་ལྷ་ཚོགས་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ཡང་དག་སྦྱོང་བྱེད་ཞིང་མཆོག་དམ་པ་རུ༔ ཨོ་རྒྱན་པདྨ་བཀྲམ་རྒྱན་དབྱེར་མེད་ལ༔ སྦྱོང་རྒྱུད་རིགས་ཀྱི་ལྷ་ཚོགས་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ སྦྱོང་བྱེད་ཐ་དད་སྣང་བའི་ཞིང་ཁམས་སུ༔ ཨོ་རྒྱན་པདྨ་མི་ནུབ་རྒྱལ་མཚན་ལ༔ གཉིས་མེད་རིགས་ཀྱི་ལྷ་ཚོགས་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ དཔུང་རྒྱན་རྒྱལ་མཚན་ཞེས་བྱའི་ཞིང་ཁམས་སུ༔ ཨོ་རྒྱན་པདྨ་མུན་སེལ་སྣང་བྱེད་ལ༔ བླ་མེད་རྣལ་འབྱོར་ལྷ་ཚོགས་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ པདྨ་རྒྱན་མཛེས་ཞིང་ཁམས་དམ་པ་རུ༔ ཨོ་རྒྱན་པདྨ་མི་ཡི་རྒྱལ་པོ་ལ༔ མ་ཧཱ་ཡོ་གའི་ལྷ་ཚོགས་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ རབ་ཏུ་མཛེས་པར་སྣང་བའི་ཞིང་
5-34-7a
ཁམས་སུ༔ ཨོ་རྒྱན་པདྨ་འཁོར་བའི་གཡུལ་ཟློག་ལ༔ ཨ་ནུ་ཡོ་གའི་ལྷ་ཚོགས་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ཙནྡན་བཀོད་པའི་ཞིང་མཆོག་དམ་པ་རུ༔ ཨོ་རྒྱན་པདྨ་རྣམ་པར་རོལ་པ་ལ༔ ཨ་ཏི་རིགས་ཀྱི་ལྷ་ཚོགས་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ སེངྒེ་འབྱུང་གནས་ཞིང་མཆོག་དམ་པ་རུ༔ ཨོ་རྒྱན་པདྨ་ཐ་མི་དད་པ་ལ༔ ཡང་ཏི་ཏི་ལའི་ལྷ་ཚོགས་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ འོག་ཕྱོགས་རྒྱ་མཚོ་ཆེན་པོའི་ཞིང་མཆོག་ཏུ༔ ཨོ་རྒྱན་པདྨ་ཀླུ་རྒྱལ་དགའ་བོ་ལ༔ ཀླུ་ཡི་རིགས་ཀྱི་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ མི་ཡུལ་ཨོ་རྒྱན་རྒྱ་གར་བོད་ཡུལ་དུ༔ ཨོ་རྒྱན་པདྨ་མི་ཡི་སློབ་དཔོན་ལ༔ མི་ཡི་རིག་འཛིན་བྱང་སེམས་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ སྟེང་ཕྱོགས་རྣམ་པར་རྒྱལ་བའི་ཞིང་མཆོག་དམ་པ་རུ༔ ཨོ་རྒྱན་པདྨ་ལྷ་ཡི་རིག་འཛིན་ལ༔ ལྷ་ཡི་རིག་འཛིན་དྲང་སྲོང་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ དམྱལ་བ་ན་ར་ཀ་ཡི་ཞིང་ཁམས་སུ༔ ཨོ་རྒྱན་པདྨ་རྣམ་པར་གནོན་པ་ལ༔ སྡུག་བསྔལ་སེལ་བྱེད་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ཡི་དྭགས་པྲེ་ཏ་ཀ་ཡི་ཞིང་ཁམས་སུ༔ ཨོ་རྒྱན་པདྨ་རྣམ་པར་སྣང་བྱེད་ལ༔ དབུལ་བ་སེལ་བའི་རིག་འཛིན་འབུམ་གྱིས་བསྐོར༔ གསོལ་བ༴ 
5-34-7b
གུ་རུ༴ གསོལ་འདེབས༴ བྱོལ་སོང་ཏིཙཪྻ་ཀ་ཡི་ཞིང་ཁམས་སུ༔ ཨོ་རྒྱན་པདྨ་སེངྒེ་སྒྲ་སྒྲོག་ལ༔ མུན་སེལ་ཤེས་རབ་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ འཛམ་གླིང་དབུས་འགྱུར་མི་ཡི་ཞིང་ཁམས་སུ༔ ཨོ་རྒྱན་པདྨ་མི་ཡི་རིག་འཛིན་ལ༔ རིག་འཛིན་གྲུབ་ཐོབ་འབུམ་ཕྲག་དུ་མས་བསྐོར༔ གསོལ་བ༴ གུ་རུ༴ གསོལ་འདེབས༴ དགའ་ལྡན་ཕུན་ཚོགས་ལྷ་ཡི་ཞིང་ཁམས་སུ༔ ཨོ་རྒྱན་པདྨ་སྲིད་ཐུབ་འཛིན་པ་ལ༔ ལྷ་ཡི་རིག་འཛིན་སངས་རྒྱས་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ལྷ་མིན་ཧེ་ས་ཀ་ཡི་ཞིང་ཁམས་སུ༔ ཨོ་རྒྱན་པདྨ་རྣམ་པར་རྒྱལ་བ་ལ༔ ལྷ་མིན་སྡེ་བརྒྱད་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ མ་འོངས་བསྐལ་པ་བྱམས་ཆེན་ཞིང་ཁམས་སུ༔ ཨོ་རྒྱན་པདྨ་རྒྱལ་སྲས་འགྲོ་འདུལ་ལ༔ མ་འོངས་བྱང་སེམས་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ གཏེར་འབྱུང་མི་ཟད་ཞིང་མཆོག་དམ་པ་ན༔ གུ་རུ་པདྨ་ཟིལ་གནོན་རྩལ་ཞེས་ལ༔ སྨོན་ལམ་རྣམ་དག་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ འདོད་འབྱུང་བསོད་ནམས་རང་བཞིན་ཞིང་ཁམས་ན༔ གུ་རུ་པདྨ་ནོར་གྱི་དབང་ཕྱུག་ལ༔ ནོར་འབྱུང་གནོད་སྦྱིན་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ཁམས་གསུམ་དབང་དུ་སྡུད་པའི་ཞིང་ཁམས་ན༔ གུ་རུ་
5-34-8a
པདྨ་དབང་མཛད་རྡོ་རྗེ་ལ༔ དབང་སྡུད་རིག་བྱེད་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ དྲག་པོས་དགྲ་བགེགས་བསྒྲལ་བའི་ཞིང་ཁམས་ན༔ གུ་རུ་པདྨ་འཇིགས་བྱེད་དྲག་པོ་རྩལ༔ སྒྲོལ་བྱེད་དྲེགས་པའི་རིག་འཛིན་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ལྷ་སྲིན་སྡེ་བརྒྱད་བསྒྲལ་བའི་ཞིང་ཁམས་ན༔ གུ་རུ་པདྨ་དམར་ནག་མེ་ཕྲེང་རྩལ༔ དྲེགས་པ་སྡེ་བརྒྱད་རིགས་ཀྱི་རིག་འཛིན་འབུམ༔ གསོལ་བ༴ གུ་རུ༴ གསོལ་འདེབས༴ དཀྱིལ་འཁོར་ཤར་ཕྱོགས་དུར་ཁྲོད་ཞིང་ཁམས་སུ༔ རྡོ་རྗེ་རིགས་ལ་དབང་བའི་སྒོ་སྲུང་ཆེ༔ ཞི་བྱེད་རྡོ་རྗེ་གིང་ཆེན་ཡབ་ཡུམ་ལ༔ གསོལ་བ༴ གུ་རུ༴ གསོལ་འདེབས༴ དཀྱིལ་འཁོར་ལྷོ་ཕྱོགས་དུར་ཁྲོད་ཞིང་ཁམས་སུ༔ རིན་ཆེན་རིགས་ལ་དབང་བའི་སྒོ་སྲུང་ཆེ༔ རྒྱས་མཛད་རིན་ཆེན་གིང་ཆེན་ཡབ་ཡུམ་ལ༔ གསོལ་བ༴ གུ་རུ༴ གསོལ་འདེབས༴ དཀྱིལ་འཁོར་ནུབ་ཕྱོགས་དུར་ཁྲོད་ཞིང་ཁམས་སུ༔ པདྨའི་རིགས་ལ་དབང་བའི་སྒོ་སྲུང་ཆེ༔ དབང་མཛད་པདྨ་གིང་ཆེན་ཡབ་ཡུམ་ལ༔ གསོལ་བ༴ གུ་རུ༴ གསོལ་འདེབས༴ དཀྱིལ་འཁོར་བྱང་ཕྱོགས་དུར་ཁྲོད་ཞིང་ཁམས་སུ༔ ཀརྨ་རིགས་ལ་དབང་བའི་སྒོ་སྲུང་ཆེ༔ སྒྲོལ་བྱེད་ཀརྨ་གིང་ཆེན་ཡབ་ཡུམ་ལ༔ གསོལ་བ༴ གུ་རུ༴ གསོལ་འདེབས༴ ཅེས་དེ་ལྟར་རྒྱུད་ཆད་མེད་པར་གསོལ་བ་ཐོབ༔ གསོལ་བ་བཏབ་པས་བྱིན་རླབས་འབྱུང་༔ ཚེ་འདིར་པདྨ་བདག་གི་ཐུགས་རྗེས་བཟུང་༔ སྒོ་གསུམ་སྨིན་ཅིང་གྲོལ་ཏེ་སངས་རྒྱས་
5-34-8b
ཐོབ༔ ཕྱི་མ་བར་དོར་ཚོམ་བུའི་ལྷ་ཚོགས་མཇལ༔ ལྷུན་གྲུབ་འོད་གསལ་ཚོམ་བུའི་ཀློང་དུ་ཐིམ༔ ཐ་མ་སྲིད་པ་བར་དོར་པདྨ་བདག༔ གསོལ་འདེབས་བུ་དེ་བསུ་བར་མ་གཅིག་པོས༔ བུ་ཉིད་རབ་ཁར་འཕྲད་ལྟར་མཁའ་སྤྱོད་དུ༔ ངེས་པར་འདྲེན་ནོ་པདྨའི་ཐ་ཚིག་ཡིན༔ ཅེས་གསུངས་དེ་ནས་ཇོ་མོ་ཡིས༔ ཕྱི་ལྟར་གསོལ་འདེབས་དེ་ལྟར་ན༔ ནང་ལྟར་གསོལ་བ་ཇི་ལྟར་བཏབ༔ ཅེས་ཞུས་གུ་རུས་གསུངས་པ་ལ༔ ཨེ་མ་ཧོ༔ ཉོན་དང་ཇོ་མོ་སྐལ་པ་ཅན༔ ནང་གི་གསོལ་བ་བཏབ་ཡུལ་ནི༔ ཡི་དམ་དཀྱིལ་འཁོར་ལྷ་ཡིན་ཏེ༔ ལྷ་ཚོགས་ཕྱི་རོལ་ཡུལ་དུ་མེད༔ རང་ལུས་རྒྱལ་བའི་ཕོ་བྲང་ལ༔ རྩ་གསུམ་ལྷ་ཡི་དཀྱིལ་འཁོར་ཡོད༔ སྙིང་ཁར་གསང་ཆེན་ཞི་བའི་ལྷ༔ དཔྲལ་བར་ཆེ་མཆོག་ཁྲོ་བོ་ལ༔ མགྲིན་པར་ཐུགས་རྗེ་ཆེན་པོ་ལ༔ ལྟེ་བར་རྟ་མཆོག་རོལ་པ་ལ༔ གསང་བར་མཁའ་འགྲོ་མ་མོའི་ཚོགས༔ བ་སྤུ་རྡོ་རྗེ་གསང་སྔགས་ལྷ༔ རྡོ་རྗེ་ཐེག་པའི་ལྷ་ཀུན་ཡོད༔ སྤྱི་བོར་བཀའ་བརྒྱུད་བླ་མར་བཅས༔ ཡན་ལག་ཆོས་སྲུང་དཔའ་བོ་གིང་༔ དེ་ཕྱིར་གསོལ་བ་འདི་བཞིན་ཐོབ༔ ཧཱུྃ༔ ཆོས་དབྱིངས་དག་པ་མཁའ་སྤྱོད་ཞིང་༔ གཙུག་ཏོར་ནམ་མཁའི་ཕོ་བྲང་དུ༔ བཀའ་བརྒྱུད་རིག་འཛིན་སྟོན་པ་བཅུ༔ དགོངས་བརྡ་སྙན་བརྒྱུད་བཅས་པ་ལ༔ མོས་གུས་གདུང་བས་གསོལ་བ་འདེབས༔ གསོལ་འདེབས་བུ་ལ་དབང་སྐུར་ཅིག༔ ས་ལ་གནས་དང་ཚེ་ལ་དབང་༔ ཕྱག་རྒྱ་ཆེན་པོ་ལྷུན་གྱིས་གྲུབ༔ རྣམ་པར་སྨིན་པའི་རིག་འཛིན་དང་༔ ཨོ་རྒྱན་རིག་འཛིན་པདྨ་འབྱུང་༔ རིག་འཛིན་བརྒྱུད་པའི་བླ་མ་ལ༔ མོས་གུས་གདུང་བས་གསོལ་བ་འདེབས༔ གསོལ་འདེབས་བུ་ལ་དབང་སྐུར་ཅིག༔ འོག་མིན་སྟུག་པོ་བཀོད་པའི་གནས༔ ཙིཏྟ་འོད་ལྔའི་ཕོ་བྲང་ན༔ བཅོམ་ལྡན་རིགས་ལྔ་སེམས་
5-34-9a
དཔའ་བརྒྱད༔ ཉེ་འཁོར་ཡབ་ཡུམ་བཅུ་བཅུས་བསྐོར༔ སྒོ་བ་ཡབ་ཡུམ་ཐུབ་ཆེན་དྲུག༔ གསང་ཆེན་དམ་པ་རིགས་བརྒྱ་ལ༔ མོས་གུས༴ གསོལ་འདེབས༴ དུར་ཁྲོད་འཇིགས་པའི་ཕོ་བྲང་ཆེ༔ དུང་ཁང་མེ་རི་འབར་བ་ན༔ ཁྲག་འཐུང་ཁྲོ་ཆེན་རིགས་ལྔ་དང་༔ བཀའ་བརྒྱད་མ་མོ་ཕྲ་མེན་ཚོགས༔ དབང་ཕྱུག་ཉི་ཤུ་རྩ་བརྒྱད་བཅས༔ མོས་གུས༴ གསོལ་འདེབས༴ ཐུགས་རྗེ་པོ་ཏ་ལ་ཡི་ཞིང་༔ ལོངས་སྤྱོད་མགྲིན་པའི་ཕོ་བྲང་ནས༔ ཐུགས་རྗེ་ཆེན་པོ་སྤྱན་རས་གཟིགས༔ ས་བཅུའི་སེམས་དཔའ་སེམས་མ་དང་༔ ཐུགས་རྗེས་སྤྲུལ་པའི་ལྷ་ཚོགས་ལ༔ མོས་གུས༴ གསོལ་འདེབས༴ མེ་རླུང་རྟ་མཆོག་རོལ་པའི་ཞིང་༔ ལྟེ་བ་སྤྲུལ་པའི་ཕོ་བྲང་ན༔ ཡི་དམ་རྟ་མགྲིན་ཡབ་ཡུམ་སྲས༔ སྒྲོལ་ཡུམ་ཕྲ་མེན་སྐུ་གསུང་ཐུགས༔ སྤྲུལ་པ་ཡང་སྤྲུལ་ཕོ་ཉར་བཅས༔ གྲངས་མེད་ལྷག་པའི་ལྷ་ཚོགས་ལ༔ མོས་གུས༴ གསོལ་འདེབས༴ དུར་ཁྲོད་གསང་ཆེན་རོལ་པའི་ཞིང་༔ གསང་གནས་བདེ་ཆེན་ཕོ་བྲང་ན༔ བདུད་འདུལ་སིཾ་ཧ་མུ་ཁ་ལེ༔ ཕྱག་བཞི་མ་མོ་དམ་ཅན་ཚོགས༔ ཞིང་སྐྱོང་གཟའ་དང་རྡོ་རྗེ་ལེགས༔ སྲོག་ལེན་ཁྱུང་ཞོན་དྲག་པོ་བཞི༔ བཀའ་སྲུང་དམ་ཅན་རྒྱ་མཚོ་ལ༔ མོས་གུས༴ གསོལ་འདེབས༴ དབྱིངས་དང་ཡེ་ཤེས་དག་པའི་ཞིང་ཁམས་སུ༔ རྩ་རླུང་ཐིག་ལེ་འབར་བའི་དུར་ཁྲོད་ན༔ རྟ་ཕག་ཡབ་ཡུམ་གསང་བ་ཡེ་ཤེས་ལ༔ དཀར་དམར་མཐིང་དང་སྒྲོལ་མ་ལྷ་མོའི་ཚོགས༔ མཁའ་འགྲོ་རིགས་ལྔ་ཡེ་
5-34-9b
ཤེས་ལས་ལས་གྲུབ༔ མོས་གུས༴ གསོལ་འདེབས༴ སྲིད་པ་གསུམ་གྱི་དུར་ཁྲོད་གཉན་པོའི་གནས༔ བྱེ་བ་ཕྲག་བརྒྱ་ཕུང་པོའི་དུར་ཁྲོད་ན༔ ཞིང་སྐྱོང་མཁའ་འགྲོ་གིང་དང་ལངྐའི་ཚོགས༔ དཔལ་མགོན་བདུན་ཅུ་ཕོ་ཉ་བཀའ་སྡོད་སོགས༔ ལེགས་ཉེས་སྟངས་འཛིན་དམ་ཅན་རྒྱ་མཚོ་ལ༔ མོས་གུས༴ གསོལ་འདེབས༴ གསོལ་བ་འདེབས་སོ་ཨོ་རྒྱན་རིན་པོ་ཆེ༔ བྱིན་གྱིས་རློབས་ཤིག་ཡི་དམ་གུ་རུ་རྗེ༔ དངོས་གྲུབ་སྩོལ་དང་མཁའ་འགྲོ་པདྨ་འབྱུང་༔ བར་ཆད་སོལ་ཅིག་ཆོས་སྐྱོང་བླ་མ་རྗེ༔ ཕྲིན་ལས་སྒྲུབས་ཤིག་དམ་ཅན་ཐོད་ཕྲེང་རྩལ༔ སྒྲུབ་མཆོག་བུ་ལ་དབང་བཞི་ཡོངས་རྫོགས་སྐུར༔ བསྐྱེད་རྫོགས་ཟུང་འཇུག་སྒྲུབ་པ་མཐར་ཕྱིན་ནས༔ ཕྲིན་ལས་རྣམ་བཞི་ལྷུན་གྲུབ་བྱིན་གྱིས་རློབས༔ གུ་རུའི་སྐུ་གསུང་ཐུགས་ཡོན་མཛད་མཉམ་ནས། བླ་མ་ཁྱེད་རང་ལྟ་བུར་བྱིན་གྱིས་རློབས༔ སྲིད་གསུམ་འཛམ་གླིང་བྱེ་བ་ཕྲག་བརྒྱ་རུ༔ གང་འདུལ་སྤྲུལ་པ་འགྱེད་པར་བྱིན་གྱིས་རློབས༔ གུ་རུ་ཁྱེད་ཀྱིས་དངོས་གྲུབ་བརྙེས་པ་དེ༔ སྒྲུབ་མཆོག་བུ་ཡིས་བརྙེས་པར་བྱིན་གྱིས་རློབས༔ གུ་རུ་ཁྱེད་ཀྱིས་སྤྲུལ་པ་འགྱེད་པ་ལྟར༔ སྒྲུབ་མཆོག་བུ་ཡིས་འགྱེད་པར་བྱིན་གྱིས་རློབས༔ ཚེ་རབས་སྐྱེ་བ་དག་པར་རྒྱུད་བསྐུལ་ནས༔ འགྲོ་དོན་འཁོར་བ་དོང་སྤྲུགས་ནུས་པར་ཤོག༔ ཅེས་པའི་གསོལ་བ་བཏབ་པ་དང་༔ གུས་པས་སྐྱོ་ཤས་མོས་གུས་བསྐྱེད༔ ངེས་འབྱུང་དད་པ་སྐྱེས་པ་དང་༔ གཉིས་མེད་ཡིད་ཀྱིས་མཉམ་པར་ཞོག༔ གང་ལྟར་འདོད་པ་དེ་ཡིས་འགྲུབ༔ 
5-34-10a
ཅེས་གསུངས་པས་མཚོ་རྒྱལ་གྱིས་ཞུས་པ༔ ནང་ལྟར་གསོལ་འདེབས་དེ་ལྟར་ན༔ གསང་བའི་གསོལ་འདེབས་ཇི་ལྟར་ལགས༔ མ་ཧཱ་གུ་རུས་གསུང་དུ་གསོལ༔ ཨེ་མ་ཧོ༔ ཉོན་ཅིག་སྣོད་ལྡན་སྐལ་ལྡན་མོ༔ གསང་ལྟར་གསོལ་བ་འདི་ལྟར་ཐོབ༔ ཅེས་གསུངས་གུ་རུ་འོད་དཔག་མེད་དུ་གྱུར༔ སྤྱི་བོར་བཛྲ་གུ་རུ་ཡབ་ཡུམ་ལ༔ རྡོ་རྗེ་མཁའ་འགྲོ་སུམ་བརྒྱ་དྲུག་ཅུ༔ མགྲིན་པར་པདྨ་གུ་རུ་ཡབ་ཡུམ་ལ༔ པདྨ་མཁའ་འགྲོ་བཅུ་དྲུག༔ ཐུགས་ཀར་བུདྡྷ་གུ་རུ་ཡབ་ཡུམ་ལ༔ བུདྡྷ་ཌཱ་ཀི་བརྒྱད༔ ལྟེ་བར་རཏྣ་གུ་རུ་ཡབ་ཡུམ་ལ༔ རཏྣ་ཌཱ་ཀི་དྲུག་ཅུ༔ གསང་གནས་ཀརྨ་གུ་རུ་ཡབ་ཡུམ་ལ༔ ཀརྨ་ཌཱ་ཀི་ཉི་ཤུ་རྩ་བཞིས་བསྐོར་བ་དང་༔ གཞན་ཡང་བ་སྤུའི་ཁུང་བུ་ཐམས་ཅད་དཔའ་བོ་དཔའ་མོའི་ལྷ་ཚོགས་ཏིལ་གྱི་གོང་བུ་ཁ་ཕྱེས་པ་ལྟར་བསྟན་ནས་བཀའ་བསྩལ་པ༔ ཨེ་མ་ཧོ༔ སྐུ་གསུམ་དག་པའི་ཞིང་ཁམས་སུ༔ སངས་རྒྱས་རིགས་འདུས་ཨོ་རྒྱན་པདྨ་ལ༔ སྐུ་གསུམ་ཡི་དམ་ཌཱ་ཀིའི་ཚོགས་ཀྱིས་བསྐོར༔ གསོལ་བ་འདེབས་སོ་ཨོ་རྒྱན་མཁའ་འགྲོའི་ཚོགས༔ གུ་རུ་ཐུགས་རྗེ་ཅན་གྱིས་བྱིན་གྱིས་རློབས༔ གསོལ་འདེབས་བུ་ལ་དབང་བཞི་ལྷུན་གྲུབ་སྐུར༔ རྩེ་མོ་རྣམ་བཀོད་སྤྱི་བོའི་འཁོར་ལོ་རུ༔ ལྷ་མཆོག་བཛྲ་གུ་རུ་ཡབ་ཡུམ་ལ༔ རྡོ་རྗེ་ཌཱ་ཀི་སུམ་བརྒྱ་དྲུག་ཅུས་བསྐོར༔ གསོལ་བ༴ གུ་རུ༴ གསོལ་འདེབས༴ མགྲིན་པ་རོ་འདུས་ངག་གི་འཁོར་ལོ་རུ༔ ལྷ་མཆོག་པདྨ་གུ་རུ་ཡབ་ཡུམ་ལ༔ པདྨ་རིགས་ཀྱི་ཌཱ་ཀི་བཅུ་དྲུག་བསྐོར༔ གསོལ་བ༴ གུ་རུ༴ གསོལ་འདེབས༴ སྙིང་ཁ་དྲན་བཀོད་ཆོས་ཀྱི་འཁོར་ལོའི་དབུས༔ ལྷ་མཆོག་བུདྡྷ་གུ་རུ་ཡབ་ཡུམ་ལ༔ བུདྡྷ་རིགས་ཀྱི་ཌཱ་
5-34-10b
ཀི་བརྒྱད་ཀྱིས་བསྐོར༔ གསོལ་བ༴ གུ་རུ༴ གསོལ་འདེབས༴ ལྟེ་བ་སྤྲུལ་པ་སྐྱེད་བྱེད་དཀྱིལ་འཁོར་དབུས༔ ལྷ་མཆོག་རཏྣ་གུ་རུ་ཡབ་ཡུམ་ལ༔ རིན་ཆེན་རིགས་ཀྱི་ཌཱ་ཀི་དྲུག་ཅུས་བསྐོར༔ གསོལ་བ༴ གུ་རུ༴ གསོལ་འདེབས༴ གསང་གནས་བདེ་བ་མྱོང་བྱེད་ཙཀྲའི་དབུས༔ ལྷ་མཆོག་ཀརྨ་གུ་རུ་ཡབ་ཡུམ་ལ༔ ཀརྨ་རིགས་ཀྱི་ཌཱ་ཀི་རྩ་བཞིས་བསྐོར༔ གསོལ་བ༴ གུ་རུ༴ གསོལ་འདེབས༴ རྩ་ཆེན་རྩ་ཕྲན་སྟོང་ཕྲག་བདུན་ཅུ་རུ༔ རིགས་འདུས་གུ་རུ་ཆེན་པོ་གཙོ་དགུ་ལ༔ རྫོགས་པའི་སངས་རྒྱས་སྟོང་ཕྲག་བདུན་ཅུས་བསྐོར༔ གསོལ་བ༴ གུ་རུ༴ གསོལ་འདེབས༴ རྣམ་ཤེས་ཚོགས་བརྒྱད་འབྱུང་ལྔ་ཁམས་ལྔའི་ཞིང་༔ སྤྲུལ་པའི་སྐུ་མཆོག་གུ་རུ་མཚན་བརྒྱད་ལ༔ རིགས་ལྔ་ཡབ་ཡུམ་མཁའ་འགྲོ་འབུམ་གྱིས་བསྐོར༔ གསོལ་བ༴ གུ་རུ༴ གསོལ་འདེབས༴ དབང་པོ་ཚོགས་དྲུག་རྟེན་འབྲེལ་བཅུ་གཉིས་ལ༔ ཨོ་རྒྱན་གུ་རུ་ཞི་ཁྲོ་སྣ་ཚོགས་གཟུགས༔ འདོད་ཡོན་ཚོགས་དྲུག་ལྷ་དང་ལྷ་མོས་བསྐོར༔ གསོལ་བ༴ གུ་རུ༴ གསོལ་འདེབས༴ བ་སྤུ་བྱེ་བ་ཉི་ཁྲི་ཆིག་སྟོང་ལ༔ ཨོ་རྒྱན་ཡང་སྤྲུལ་བྱེ་བ་ཉི་ཁྲིའི་ཚོགས༔ གིང་དང་ཆོས་སྐྱོང་དམ་ཅན་རྒྱ་མཚོས་བསྐོར༔ གསོལ་བ༴ གུ་རུ༴ གསོལ་འདེབས་བུ་ལ་དབང་བཞི་ལྷུན་གྲུབ་སྐུར༔ ཐུགས་ཡིད་གཅིག་ཏུ་བསྲེས་ལ་དབང་འདི་ཞུས༔ ཧོ༔ སྤྲུལ་པའི་སྐུ་མཆོག་ཨོ་རྒྱན་རིན་པོ་ཆེ༔ སྒྲུབ་མཆོག་བུ་དང་མཁའ་མཉམ་འགྲོ་ཀུན་གྱི༔ སྤྱི་བོ་བདེ་ཆེན་ལུས་ཀྱི་འཁོར་ལོའི་དབུས༔ བརྟན་
5-34-11a
པར་བཞུགས་ལ་དགའ་བའི་བུམ་དབང་སྐུར༔ གང་འདུལ་སྤྲུལ་པ་འགྱེད་པར་བྱིན་གྱིས་རློབས༔ ལོངས་སྤྱོད་རྫོགས་སྐུ་ཨོ་རྒྱན་རིན་པོ་ཆེ༔ སྒྲུབ་མཆོག་བུ་དང་མཁའ་མཉམ་འགྲོ་ཀུན་གྱི༔ མགྲིན་པ་རོ་འདུས་ངག་གི་འཁོར་ལོའི་དབུས༔ བརྟན་པར་བཞུགས་ལ་མཆོག་དགའི་གསང་དབང་སྐུར༔ ཐེག་ཆེན་ཆོས་ཀྱིས་འགྲོ་འདུལ་བྱིན་གྱིས་རློབས༔ ཆོས་སྐུ་ཀུན་བཟང་ཨོ་རྒྱན་རིན་པོ་ཆེ༔ སྒྲུབ་མཆོག་བུ་དང་མཁའ༴ སྙིང་ཁ་དྲན་བཀོད་ཆོས་ཀྱི་འཁོར་ལོའི་དབུས༔ བརྟན་པར་བཞུགས་ལ་དགའ་བྲལ་ཤེར་དབང་སྐུར༔ མཁྱེན་གསུམ་དབྱེར་མེད་འགྲོ་འདུལ་བྱིན་གྱིས་རློབས༔ ངོ་བོ་ཉིད་སྐུ་ཨོ་རྒྱན་རིན་པོ་ཆེ༔ སྒྲུབ་མཆོག་བུ་དང་༴ ལྟེ་བ་སྤྲུལ་པ་སྐྱེད་བྱེད་འཁོར་ལོའི་དབུས༔ བརྟན་པར་བཞུགས་ལ་ལྷན་དགའི་དོན་དབང་སྐུར༔ སྣང་སྲིད་འཁོར་འདས་དབང་བསྐུར་བྱིན་གྱིས་རློབས༔ མངོན་པར་བྱང་ཆུབ་ཨོ་རྒྱན་རིན་པོ་ཆེ༔ སྒྲུབ་མཆོག༴ གསང་གནས་བདེ་བ་མྱོང་བྱེད་ཙཀྲའི་དབུས༔ བརྟན་པར་བཞུགས་ལ་ཕྲིན་ལས་བཞི་དབང་སྐུར༔ བསྡུ་བ་རྣམ་བཞིས་འགྲོ་འདུལ་བྱིན་གྱིས་རློབས༔ རྡོ་རྗེ་སྐུ་མཆོག་ཨོ་རྒྱན་རིན་པོ་ཆེ༔ སྒྲུབ་མཆོག༴ ཙིཏྟ་རིན་ཆེན་སེམས་ཀྱི་དཀྱིལ་འཁོར་དུ༔ བརྟན་པར་བཞུགས་ལ་ཨ་ཏི་གཅིག་ཅར་སྐུར༔ རྒྱལ་ཚབ་རྡོ་རྗེ་སློབ་དཔོན་བྱིན་གྱིས་རློབས༔ ཨེ་མ་ཧོ༔ ཨ་ལ་ལ༔ དབང་བསྐུར་རྡོ་རྗེ་རྒྱལ་པོར་བྱིན་བརླབས་ནས༔ དབང་བཞིའི་ཆུ་བོས་བདག་རྒྱུད་ལེགས་འཁྲུད་ཅིང་༔ དགའ་བ་རྣམ་བཞིའི་དྲི་ཡིས་ལེགས་བྱུགས་ལ༔ བསྡུ་བ་རྣམ་
5-34-11b
བཞིས་འགྲོ་ཀུན་དབང་དུ་སྡུས༔ ཕྲིན་ལས་རྣམ་བཞིས་འགྲོ་དོན་ཐོགས་མེད་ཀྱིས༔ སྐྱེ་གནས་བཞི་དང་འགྲོ་ཀུན་མ་ལུས་པ༔ བྱང་ཆུབ་བདེ་ཆེན་ལམ་ལ་བཀོད་གྱུར་ནས༔ ཁམས་གསུམ་སྲིད་པ་འཁོར་བ་སྟོངས་གྱུར་ཅིག༔ ཅེས་པས་དབང་བླང་རྗེས་ཤེས་ངོ་བོ་ལ༔ མོས་གུས་སེམས་བཟུང་རྡོ་རྗེའི་སྙིང་པོ་བཟླས༔ སྣང་སྲིད་འཁོར་འདས་ཐམས་ཅད་རང་སེམས་ཏེ༔ རང་སེམས་ངོ་བོ་བླ་མར་སྒྲུབ་པ་ལ༔ སྒྲུབ་ཐབས་ཕྱི་ནང་གྲངས་མང་སོ་སོར་བསྟན༔ ཚེ་གཅིག་རང་སེམས་སངས་རྒྱས་ཐོབ་པའི་ཕྱིར༔ གསང་སྔགས་ཀུན་གྱི་ལམ་མཆོག་སྒྲུབ་པའི་ཐིག༔ མོས་གུས་གསོལ་འདེབས་ཁོ་ན་ཟབ་ལ་མཆོག༔ དེ་ཕྱིར་ཚེ་གཅིག་གསང་སྔགས་སྒྲུབ་པའི་ཐབས༔ གསང་སྔགས་རྩ་བ་བླ་མ་ཉིད་ཡིན་པས༔ བླ་མ་རྟག་ཏུ་སྒོམས་ལ་གསོལ་བ་ཐོབ༔ ཅེས་གསུངས་སོ༔ ཡང་མཚོ་རྒྱལ་གྱིས་ཞུས་པ༔ བླ་མེད་ཡང་གསང་ལྟར་དུ་གསོལ་བ་ཇི་ལྟར་གདབ༔ ཅེས་ཞུས་ཨོ་རྒྱན་གུ་རུས་བཀའ་བསྩལ་པ༔ ཨེ་མ་ཇོ་མོ་གུས་པས་ཉོན་གསུངས་ནས༔ གུ་རུའི་ཐུགས་ཀར་འོད་ལྔའི་དབུས་སུ༔ ཙིཏྟ་རིན་ཆེན་འབར་བ་ཟུར་བརྒྱད་པའི་སྟེང་དུ་འོད་དཔག་མེད་སྐུ་མདོག་དམར་པོ་རྒྱན་དུ་མས་སྤྲས་པ༔ ཕྱག་མཉམ་གཞག་བུམ་པ་བསྣམས་པ༔ འཁོར་བྱང་ཆུབ་སེམས་དཔའ་ཡབ་ཡུམ་བཅུ་དྲུག༔ དེའི་ཐུགས་ཀར་ཀུན་བཟང་ཡབ་ཡུམ་མཐིང་ག་མཉམ་གཞག་རྒྱན་མེད་པ༔ དེའི་ཐུགས་ཀར་པདྨའི་ཟེའུ་འབྲུའི་ནང་དུ༔ པདྨ་རཱ་གའི་རྡོ་རྗེ་ཕྱེད་པའི་ལྟེ་བར་གུ་རུ་ཡབ་ཡུམ་ཉུངས་དཀར་ཙམ་དམར་པོ་རྡོ་རྗེ་དང་དྲིལ་བུ་བསྣམས་པ༔ ཡུམ་ནོར་བུ་དང་ཐོད་པ་བསྣམས་པ་དཀར་མོ་སྐུ་ལ་འཁྲིལ་པ༔ དེའི་ཐུགས་སྲོག་ཧྲཱིཿལ་སྔགས་འཁོར་བར་བསྟན་ནས་འདི་སྐད་གསུངས༔ སྤྲོས་བྲལ་ཆོས་ཀྱི་དབྱིངས་ཀྱི་ཕོ་བྲང་ནས༔ ཆོས་ཉིད་འགྱུར་མེད་སྐྱེ་འགག་བྲལ་བའི་ངང་༔ བྱ་བྲལ་ལྷུན་རྫོགས་བདེ་བ་ཆེན་པོའི་སྐུ༔ ནམ་མཁའ་བཞིན་དུ་ཐུགས་རྗེ་ཕྱོགས་རིས་
5-34-12a
མེད༔ བླ་མ་ཨོ་རྒྱན་ཆོས་ཀྱི་སྐུ་མཆོག་ལ༔ གསོལ་བ་འདེབས་སོ་དབང་སྐུར་བྱིན་གྱིས་རློབས༔ བདེ་ཆེན་ལྷུན་གྱིས་གྲུབ་པའི་ཕོ་བྲང་དུ༔ བྱ་རྩོལ་ལྷུན་གྲུབ་འོད་གསལ་འདུས་མ་བྱས༔ གང་འདུལ་བདེ་ཆེན་དཀྱིལ་འཁོར་འབྱུང་བའི་གནས༔ འོད་དཔག་མེད་པ་སེམས་དཔའ་ལོངས་སྤྱོད་རྫོགས༔ གསོལ་བ༴ འོག་མིན་པདྨ་འོད་ཀྱི་ཕོ་བྲང་དུ༔ ཐུགས་རྗེས་གང་འདུལ་འགྲོ་བའི་དོན་དུ་ཤར༔ གདུལ་བྱ་སྣ་ཚོགས་སོ་སོར་སྐུར་བསྟན་ནས༔ གསང་སྔགས་ཐེག་ཆེན་ལམ་ལ་འགོད་མཛད་པའི༔ བླ་མ་ཨོ་རྒྱན་སྤྲུལ་པའི་སྐུ་མཆོག་ལ༔ གསོལ་བ་འདེབས་སོ་དབང་སྐུར་བྱིན་གྱིས་རློབས༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་པ་བླ་མ་སྐུ་གསུམ་ངོ་བོ་ལ༔ གསོལ་བ་བཏབ་པས་བྱིན་རླབས་ཐོག་བབ་འབྱུང་༔ བདག་ཉིད་ཆེན་པོ་པདྨ་འབྱུང་གནས་ནི༔ མཆོག་གསུམ་རྩ་གསུམ་སྐུ་གསུམ་ཀུན་འདུས་ཡིན༔ བདེ་གཤེགས་རྒྱལ་བ་ཀུན་འདུས་གུ་རུ་ལ༔ མ་འོངས་རྗེས་འཇུག་བྱང་ཆུབ་ཐོབ་པའི་ཕྱིར༔ ནངས་ནུབ་དུས་དྲུག་ཐུན་བཟུང་གསོལ་བ་ཐོབ༔ རྗེས་འཇུག་བྱང་ཆུབ་ཐོབ་པར་གདོན་མི་ཟ༔ ཡེ་ཤེས་མཚོ་རྒྱལ་ཐུགས་ལ་དེ་ལྟར་ཞོག༔ མ་འོངས་ཐ་མའི་དུས་སུ་བདག་གི་བུ༔ ཤིང་ཁམས་ལུག་ལོ་དཔའ་བོ་རྒྱན་དྲུག་ཐོགས༔ ཀུན་གྱིས་ཐེ་ཚོམ་ཆུང་ཞིང་དད་པའི་མི༔ རྡོ་རྗེའི་མིང་ཅན་དེ་དང་འཕྲད་པར་འགྱུར༔ དེ་དུས་སེམས་ཅན་བསོད་ནམས་དམན་པ་ལ༔ དུས་འགྱུར་སྣ་ཚོགས་བྱ་ལོང་སྐད་ལྟར་སྒྲོགས༔ མི་ཆེན་མ་ལུས་ཟས་ངན་དུག་གིས་གསོད༔ ནང་ནས་སེམས་ཅན་ཁྲེལ་དང་ངོ་ཚ་མེད༔ ཉོན་མོངས་དུག་ལྔ་འཇོལ་ཉོག་སྤྱོད་པར་བྱེད༔ ཕྱི་ནང་རྒྱལ་བློན་ཁྲིམས་རར་མནའ་གཞུང་མེད༔ གང་ངན་གང་ཐུབ་ཅི་ནུས་འབད་ནས་སྤྱོད༔ གང་ནས་ལྷ་མི་སྐྱིད་སྡུག་ཟད་པའི་མཐུས༔ གང་བཙོག་ལས་ངན་དག་ལ་མི་འཇུག་
5-34-12b
མེད༔ དེ་དུས་སྡུག་བསྔལ་སྐྱོབ་པའི་སེམས་བསྐྱེད་ནས༔ བླ་མ་ནོར་བུ་ཡི་དམ་རྟ་མགྲིན་དབང་༔ མཁའ་འགྲོར་བཅས་པ་ཡོ་ག་གསུམ་གྱི་ཆོས༔ རིན་ཆེན་གཏེར་སྦས་བྱང་ཆུབ་སེམས་དཔའ་ཞིག༔ འགྲོ་ལ་ཕྱོགས་རིས་མེད་པའི་སྙིང་རྗེ་ཅན༔ སྐལ་ལྡན་དེ་དང་འཕྲད་པའི་སྨོན་ལམ་བྱེད༔ ཆོས་བདག་རྩ་བ་མ་ནོར་བརྟགས་ལ་སྦྱིན༔ སྤྲུལ་པ་གཉིས་ཡིན་ཏེ༔ གངས་ཅན་འགྲོ་བ་འདྲེན་པའི་སྨོན་ལམ་ཡོད༔ པདྨ་བདག་དང་སྤྱན་གཟིགས་དངོས་ཡིན་པས༔ ཀུན་གྱིས་བཀུར་ན་གངས་ཅན་སེམས་ཅན་བདེ༔ རིས་སུ་བཅད་ན་རྒྱལ་ཁམས་སིལ་བུར་འགྱུར༔ དེ་ཕྱིར་བོད་ཀྱི་བསྟན་པ་འཚོ་ཤེས་མཛོད༔ ས་མ་ཡ༔ རྒྱ་རྒྱ་རྒྱ༔ གསོལ་འདེབས་ལེའུ་བཞི་པ་ཞེས་བྱ་བ་རྫོགས་སོ༔ ཨྠི་༔ ཟབ་རྒྱ༔ དམ་རྒྱ༔ གཉན་རྒྱ༔ སྦས་རྒྱ༔ གཏད་རྒྱ༔ གསང་རྒྱ༔ བདག་སྟག་ཤམ་པས་སྤྲེའུ་ལོ་ཧོར་ཟླ་གཉིས་པ་ལ་ཤོག་སེར་ནས་བཤུས་སོ།། །།


